ចំណាប់អាម្មរណ៍ពលរដ្ឋខ្មែរជុំវិញបញ្ហានៅតំបន់ប្រាសាទព្រះវិហារ ខែសីហា 24, 2008
Posted by សុភ័ក្ត្រ in ព័ត៌មាន.trackback
ដោយ សោភ័ណ
2008-08-23
ក្នុងរយៈពេលជាងមួយខែដែលទាហានថៃបានមកឈ្លានពានទឹកដីខ្មែរនៅតំបន់ប្រាសាទព្រះវិហារ គេសង្កេតឃើញខ្មែរស្ទើរគ្រប់រូបចងកំហឹង និងបានចូលរួមជាថវិកាដើម្បីបង្ហាញពីទឹកចិត្តស្នេហាជាតិ ។
RFA Photo/Keo Nimol
ប្រាសាទព្រះវិហារខ្មែរ នៅលើកំពូលភ្នំដងរែក នៃខេត្តព្រះវិហារ។
ក្នុងរយៈពេលនេះដែរអ្នកលក់កាសែតអាននិងអ្នកលក់កាសែតចម្រៀង ស៊ីឌីចម្រៀង ពាក់ព័ន្ធនឹងប្រាសាទព្រះវិហារ បានអះអាងថាមានអតិថិជនជាច្រើនបានកើនឡើងលើសលប់ក្នុងការជាវដើម្បីចង់ដឹងបន្ថែមអំពីប្រវត្តិទឹកដីរបស់ខ្លួន ។
ស្រ្តីលក់កាសែតម្នាក់ដែលមានតូបលក់នៅក្បែរវត្តឧណ្ណាឡោម ឈ្មោះ ធឿន បាន ប្រាប់វិទ្យុអាស៊ីសេរី កាលពីថ្ងៃទី២០ ខែសីហា ថាចាប់តាំងពីមានជម្លោះប្រាសាទព្រះវិហារមក កញ្ញាសង្កេតឃើញថាអ្នកដែលមិនធ្លាប់ទិញនិងអានកាសែតសោះ បែរជាមកជាវរាល់ថ្ងៃ។
កញ្ញា ធឿន បានបន្តថាជាធម្មតាមួយថ្ងៃលក់បានតែ៥០ច្បាប់ប៉ុណ្ណោះ តែចាប់តាំងពីមានរឿងថៃចូលលុកលុយក្នុងទឹកដីប្រាសាទព្រះវិហារមក ក្នុងមួយថ្ងៃកញ្ញាលក់បានពី១០០ទៅ១២០ច្បាប់ ៖ «ប្រជាជនយើងចង់ដឹងច្រើន ។ ពីមុនអស់តែ ៥០-៦០ច្បាប់អី» ។
ចំណែកឯស្ត្រីវ័យកណ្តាលម្នាក់មានតូបលក់កាសែតអាននៅក្បែរវត្តលង្កា ក៏បានអះអាងប្រហាក់ប្រហែលគ្នាថា ៖ «ដូចធ្លាប់យើង៥០អ៊ីចឹង ដល់ពេលមានរឿង វាឡើងដល់ ៧០ ។ ខ្មែរយើងចង់ដឹងពីរឿងទឹកដីរបស់ខ្មែរយើង ប្រាសាទព្រះវិហារ តើបានរបស់យើងវិញក៏អត់» ។
មិនខុសគ្នាប៉ុន្មាននឹងអ្នកលក់កាសែតចម្រៀង ស៊ីឌីចម្រៀងនៅផ្សារចាស់ លោក ទូច បានឲ្យដឹងថាក្នុងរយៈពេលដែលមានការឈ្លានពានរបស់ថៃមកលើទឹកដីប្រាសាទព្រះវិហារ គឺមានអតិថិជនមកសួររកនិងជាវបទចម្រៀងមិនថាពាក់ព័ន្ធនឹងប្រាសាទព្រះវិហារទេ ឲ្យតែបទចម្រៀងពាក់ព័ន្ធនឹងប្រវត្តិសាស្ត្រខ្មែរគឺលក់ដាច់ច្រើនជាងមុន មិនថាបទចាស់ឬថ្មីទេ ។
រីឯនិស្សិតម្នាក់ឈ្មោះ សុ ជាតា អាយុ១៧ឆ្នាំ រៀននៅមហាវិទ្យាល័យ BBU បានបង្ហាញពីទឹកចិត្តរបស់ខ្លួនចំពោះប្រទេសជាតិថា នាងមានចំណាប់អារម្មណ៍ស្តាប់បទចម្រៀងទាំងថ្មី ទាំងចាស់ ឲ្យតែនិយាយអំពីប្រាសាទព្រះវិហារនិងពីទឹកដីខ្មែរ ។
កញ្ញា សុ ជាតា បាននិយាយថា ៖ «ស្ដាប់បទចម្រៀងហ្នឹង គឺចង់ដឹងពីប្រាសាទហ្នឹង ហើយនិងពាក់ព័ន្ធនឹងទឹកដី» ។
និពន្ធនាយកកាសែតរស្មីកម្ពុជា លោក ប៉ែន សុមិ្មធិ មានប្រសាសន៍ថាជាធម្មតារាល់ការបោះពុម្ភផ្សាយរដូវបោះឆ្នោតម្តងៗ ត្រូវបង្កើនការបោះពុម្ភ៥០% ប៉ុន្តែដោយសារតែប្រទេសកម្ពុជាត្រូវទាហានថៃមកឈ្លានពាននៅតំបន់ប្រាសាទព្រះវិហារ ក៏មានការដំឡើងការបោះពុម្ភផ្សាយ៥០%ទៀតដើម្បីបំពេញតម្រូវការរបស់អតិថិជន ។
លោក ប៉ែន សុមិ្មធិ បានមានប្រសាសន៍ថា ៖ «មានហេតុការណ៍ប្រាសាទព្រះវិហារកើតឡើង ចំនួនបានកើនឡើងថែមទៀត ហើយដែលយើងគិតមើលទៅវាស្ទើរតែកើន ១០០% ហើយមកទល់ពេលហ្នឹង គឺចំនួនហ្នឹងនៅតែរក្សាស្ថានភាពដដែល មិនទាន់ថយចុះ ។ យើងចែក ៧០% កាសែតហ្នឹង នៅទីក្រុងភ្នំពេញ ហើយ ៣០% ទៀត ទៅខេត្ត គ្រប់ខេត្តទាំងអស់ ។ ចំនួនកើនឡើងហ្នឹងគឺប្រហាក់ប្រហែលគ្នា ទាំងនៅខេត្ត ទាំងនៅក្រុង» ។
បុរសម្នាក់ដែលកំពុងតែអានកាសែតនៅមុខតូបលក់កាសែតខាងជើងវត្តឧណ្ណាឡោម បានឲ្យដឹងថាពីមុនលោកមិនដែលអានកាសែតឬព័ត៌មានទេ តែក្នុងនាមលោកជាពលរដ្ឋខ្មែរម្នាក់ លោកចង់ដឹងពីការវិត្តន៍ក្នុងរឿងប្រាសាទព្រះវិហារ ដែលថ្មីៗឮថាទាហានថៃបានឈ្លានពាននោះ ដូច្នេះលោកត្រូវមកជាវកាសែតមកអានរាល់ថ្ងៃ ហើយតាមដានព័ត៌មាននៅតាមប៉ុស្តិ៍វិទ្យុ ទូរស្សន៍ផងដែរ ។
បុរសដដែលបានឲ្យដឹងថា ៖ «ព្រោះអានេះវាជារឿងប្រទេសជាតិដែរ ដល់អ៊ីចឹងខ្ញុំជាប្រជាជនខ្មែរម្នាក់ យើងត្រូវតែដឹង វាមិនបានដឹងរឿងអស់ ក៏បានដឹងខ្លះៗដែរ» ។
អ្នកនិពន្ធនិងជាទីប្រឹក្សារបស់លោកនាយរដ្ឋមន្ត្រី ហ៊ុន សែន លោក ហ៊ុន ហេង មានប្រសាសន៍ថា អំឡុងពេលដែលប្រាសាទព្រះវិហារបានដាក់ចូលជាបេតិកភណ្ឌពិភពលោក លោកបាននិពន្ធបទចម្រៀងចំនួន៦បទរួចមកហើយ បទទាំងនោះគឺឆ្លុះបញ្ចាំងពីភាពអស្ចារ្យនៃប្រាសាទព្រះវិហាររបស់ខ្មែរ និងនិយាយអំពីការអបអរសាទរប្រាសាទព្រះវិហារដែលបានចូលជាបេតិកភណ្ឌពិភពលោក ។
លោកក៏បានបង្ហាញពីបំណងនៃការនិពន្ធនេះថា ៖ «ខ្ញុំក៏ដូចជាអ្នកទាំងអស់គ្នាដែរ រីករាយនឹងបេតិកភណ្ឌរបស់ខ្មែរ ឬក៏ថាជាកេតនភណ្ឌរបស់ខ្មែរ បានក្លាយទៅជាបេតិកភណ្ឌពិភពលោក គឺថាវាមានចំណាត់ថ្នាក់ស្នាដៃបុព្វបុរសយើង ចំណាត់ថ្នាក់ដែលពិភពលោកទទួលស្គាល់យកទៅទៀត ទៅថែរក្សាអ៊ីចឹង ។ បំណងអ៊ីចឹងឯង លើកតម្កើងខ្មែរយើង មានមោទនភាព» ។
លោក សឺន និត ដែលជាពលរដ្ឋម្នាក់នៅក្នុងទីក្រុងភ្នំពេញបានប្រាប់វិទ្យុអាស៊ីសេរីថា លោកបានចងក្រងបទចម្រៀងមួយស៊ីឌីដែលមានចំនួន១៤បទ ទាំងបទសម័យចាស់និងសម័យបច្ចុប្បន្ននេះ ដែលពាក់ព័ន្ធនឹងប្រាសាទព្រះវិហារ និងភាពអស្ចារ្យរបស់ខ្មែរ ។ ការប្រមូលផ្ដុំបទចម្រៀងនេះគឺក្នុងគោលបំណងដើម្បីរំឭកឲ្យខ្មែរទាំងអស់ចេះស្រឡាញ់គ្នា ៕
http://www.rfa.org/khmer/indepth/public-interests-over-PV-issue-08232008070047.html
មតិ»
No comments yet — be the first.