ពលរដ្ឋនៅខែត្រព្រះវិហារអបអរការដាក់ប្រាសាទព្រះវិហារជាសម្បត្តិពិភពលោក ខែកក្កដា 10, 2008
Posted by សុភ័ក្ត្រ in ព័ត៌មាន.trackback
ដោយ សាវយុត
2008-07-10
មន្ត្រីរាជការនិងប្រជាពលរដ្ឋប្រមាណ៥ពាន់នាក់នៅខេត្តព្រះវិហារបានមកជួបជុំគ្នាកាលពីព្រឹកថ្ងៃព្រហស្បតិ៍ទី១០ ខែកក្កដា ដើម្បីធ្វើពិធីអបអរសាទរចំពោះប្រាសាទព្រះវិហារដែលបានដាក់បញ្ចូលទៅក្នុងបញ្ជីបេតិកភណ្ឌពិភពលោក និងបានគោរពវិញ្ញាណក្ខ័ន្ធបុព្វបុរសខ្មែរទាំងអស់ដែលបានបូជាជីវិតដើម្បីប្រាសាទព្រះវិហារផងដែរ ។
Photo courtesy of Tharum Bun, http://tharum.info
អ្នកទេសចរដើរទស្សនាប្រាសាទព្រះវិហារនៅលើកំពូលភ្នំដងរែក ក្នុងឆ្នាំ២០០៦។
អភិបាលរងខេត្តព្រះវិហារ លោក ស សំអុល បានមានប្រសាសន៍ថា មន្ត្រីរាជការ ព្រះសង្ឃ និងប្រជាពលរដ្ឋប្រមាណ៥ពាន់នាក់ បានមកប្រជុំគ្នាក្នុងទីរួមខេត្តព្រះវិហារដោយធ្វើមិទ្ទិញអបអរសាទរប្រាសាទព្រះវិហារ និងបានគោរពដល់វិញ្ញាណក្ខ័ន្ធបុព្វបុរសខ្មែរគ្រប់ៗជំនាន់ដែលបានលះបង់ជីវិតដើម្បីប្រាសាទព្រះវិហារនេះ ។
លោក ស សំអុល បានឲ្យដឹងថា ៖ «ធ្វើជាមិទ្ទិញមហាជនមួយនៅពហុកីឡាដ្ឋានខេត្តនេះណា៎ ។ យើងមានការគោរពវិញ្ញាណក្ខ័ន្ធដល់បុព្វការីជនយើងដែលបានពលីជីវិតដើម្បីប្រាសាទព្រះវិហារហ្នឹងកាលពីអតីតកាល» ។
ចំណែកប្រជាពលរដ្ឋខ្មែរដែលកំពុងរស់នៅលើខ្នងភ្នំប្រាសាទព្រះវិហារ បានមានប្រសាសន៍ថាពួកគាត់មានក្តីរំភើបសប្បាយរីករាយដោយនាំគ្នាចាក់ធុងបាសរាំចំនួន៣យប់៣ថ្ងៃ នៅពេលដែលឮថាប្រាសាទព្រះវិហារបានចូលទៅក្នុងបញ្ជីបេតិកភណ្ឌពិភពលោក ក៏ប៉ុន្តែពួកគេនៅតែព្រួយបារម្ភចំពោះការគំរាមកំហែងពីក្រុមបាតុករថៃដែលនៅតែព្រមានតាមការផ្សាយទូរទស្សន៍នៅឡើយ ហើយរយៈពេលពីរថ្ងៃមកនេះគេឃើញយន្តហោះថៃបានហោះឆ្វែលលើប្រាសាទព្រះវិហារនិងថតយករូបភាពផង ។
ប្រជាពលរដ្ឋនៅលើខ្នងភ្នំប្រាសាទព្រះវិហារបានឲ្យដឹងថា ៖ «មានអារម្មណ៍ថារីករាយត្រេកអរមែនទែន ។ ប៉ុន្តែវានៅព្រួយបារម្ភពីរឿងថៃ វាចេះតែផ្សាយព័ត៌មាននៅក្នុងទូរទស្សន៍ថា វាទុករយៈពេល៣០ថ្ងៃឲ្យរដ្ឋមន្ត្រីវាដោះស្រាយ ។ ដោះស្រាយមិនចេញទេ ប្រជាជនវាមកផ្ទាល់ មកយកដីនេះតែម្ដង ព័ត៌មានវាផ្សាយអ៊ីចឹង ។ យន្តហោះរបស់ថៃ ថតតាមយន្តហោះឯលើ តែវាចូលមកខាងយើងតិចៗដែរ» ។
នៅល្ងាចថ្ងៃព្រហស្បតិ៍ ទី១០ ខែកក្កដានេះដែរ នៅឯខេត្តសៀមរាបមានមនុស្សប្រមាណ៣ពាន់នាក់បានចូលរួមប្រារព្ធពិធីអបអរសាទរប្រាសាទព្រះវិហារដែលបានដាក់បញ្ចូលទៅក្នុងបញ្ជីបេតិកភណ្ឌពិភពលោកដែរ ដោយពិធីនេះបានរៀបចំឡើងដោយអាជ្ញាធរអប្សរានៅពីមុខប្រាសាទអង្គរវត្ត ។
អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានមានប្រសាសន៍ថាប្រាសាទព្រះវិហាររបស់ខ្មែរមិនត្រឹមតែមានការទទួលស្គាល់ចុះបញ្ជីបេតិកភណ្ឌពិភពលោកតែប៉ុណ្ណោះទេ គឺថែមទាំងទទួលបានជំនួយផ្នែកហិរញ្ញវត្ថុនិងផ្នែកបច្ចេកទេសនៅក្នុងកិច្ចការពារថែរក្សានិងការអភិវឌ្ឍដោយចីរភាពទៀតផង ។
លោក ផៃ ស៊ីផាន បានមានប្រសាសន៍ថា ៖ «សម្ដេចតេជោ ហ៊ុន សែន លោកចង់ឃើញប្រាសាទព្រះវិហារមិនមែនឯកោតែឯងនៅលើកំពូលភ្នំដែលពិបាកនឹងចុះឡើងទេ គឺថាប្រាសាទព្រះវិហារឥឡូវនេះនៅជាមួយប្រជាពលរដ្ឋទាំងអស់នៅក្នុងពិភពលោក» ។
សូមបញ្ជាក់ថាកាលពីថ្ងៃទី៧ ខែកក្កដាកន្លងមក ប្រទេសចំនួន២១ដែលជាគណៈកម្មការបេតិកភណ្ឌពិភពលោកដែលបានប្រជុំនៅប្រទេសកាណាដា បានសម្រេចគាំទ្រដាក់ប្រាសាទព្រះវិហារបញ្ចូលទៅក្នុងបញ្ជីបេតិកភណ្ឌពិភពលោក ។
យោងតាមឯកសាររបស់អង្គការ UNESCO ប្រចាំកម្ពុជា បានឲ្យដឹងថារដ្ឋាភិបាលកម្ពុជាបានស្នើសុំអង្គការ UNESCO ឲ្យដាក់បញ្ចូលប្រាសាទព្រះវិហារទៅក្នុងបញ្ជីបេតិកភណ្ឌពិភពលោកតាំងពីថ្ងៃទី១០ ខែតុលា ឆ្នាំ២០០១ ហើយរហូតមកដល់ពេលនេះបំណងទាំងនោះបានសម្រេចហើយ ៕
ប្រភព៖ http://www.rfa.org/khmer/indepth/people-in-PreahVihear-celebrate-temple-listing-07102008092921.html
មតិ»
No comments yet — be the first.